‘Efesō 4: 1-6

Ke Tau Taha ‘ia Kalaisi

Ko e uho ‘o e akonaki ‘a Paula ‘i he folofola ni, ke tau taha pe.  Ko e taimi ‘oku tau taha aí, ‘oku puli ai hotau fai kehekehe mo e kakai kehé. ‘Oku ‘ikai ko ha me‘a ‘oku hoko fakatu‘upakē mai ‘a e hoko ‘a e kehekehe ‘o taha, ka kuo pau ke taimi lahi hono palaní pea mo e ngāue ‘e fai ki aí. 

‘Oku tokanga mamafa ‘a e ‘aposetolo ni, ko e taimi ‘oku te falala kakato ai ki he ‘Eikí, ‘oku tau laka ‘o taau pea tuha mo e lakanga ko ia, ko e kau Kalisitiane. Ko e kakai ‘oku ‘ikai lau ha fai kehekehe, ka ‘oku hu‘ufataha ‘enau fakakaukau, tokanga mo ‘enau ngāué, ke fakahaa‘i ‘oku nau taha pe mo Kalaisi. Ko e fakatātā ‘o e taha ‘o e sinó ka e kehekehe ‘a e ngaahi kupú, ka ‘oku taha pe ‘enau taumu‘a ngāué, ke langa hake ‘a e sino ‘oku nau kainga taha ki aí. 

Ko e fakakaukau ‘o e tahá, ‘oku fakamā‘opo‘opo kakato ia ‘e he fakakaukau ‘o e Taha tofu pe ‘a e ‘Otuá ka e tolu Hono ngaahi Huafá. Ko e ‘Otua ko e Tamai, ‘oku ne fai ‘a e Fakatupu me‘a ‘i mamaní. Ko e ‘Otua ko e ‘Aló, ‘oku ne fakahaa‘i ‘a e ‘Ai Kakano ‘a e ‘Otuá ‘ia Sīsū Kalaisí, ko e Fakamo‘ui ‘o mamani. Ko e ‘Otua ko e Laumālie Mā‘oni‘oni, ‘oku hoko mai ko e Taukapo ke feohi tu‘uma‘u mo koe mo au ‘i he taimi kotoa pe. 

Ko Sione Uesilē na‘e tokanga ke hu‘ufa taha ‘a e tui ‘a e kakai kotoa pe ‘ia Sīsū Kalaisi, ka e lava kenau ‘inasi ‘i he mo‘ui ta‘engatá.  Ko hotau fekaú ia, tau taha pe ‘ia Kalaisi, ko e faka‘ilonga ‘o e Kalisitiane mo‘oni. 

Fifili: Ko hai ‘oku ou taha mo ia ‘i he fononga‘angá?

Lotu: Sīsū, ha‘ele mai ke ta fononga mo koe ‘i he ‘aho kotoa pe. ‘Emeni.

Palōvepi  8: 1-4, 22-31

Monū‘ia ‘a e ‘Alunga ‘o e Potó

Ko e tohi Palōvepi ‘eni mo e fakamatala ‘o e Potó. ‘Oku hangē ‘a Poto ko ha tangata ‘oku lea mai ketau fanongo ange ki ai, pea ‘oku ne ‘omai ‘a e ngaahi fakahinohino ketau muimui ki ai. ‘Oku fakamatala ‘a e folofola ‘o e ‘aho ni, ko Poto na‘e ‘i he kamata‘angá ‘i he taimi na‘e fakatupu ai ‘a mamaní pea ko Poto ‘e a‘u ki he ngata‘anga ‘o  mamaní.

‘Oku mahino mei he folofola ni, na‘e ‘ikai ha taha ia ‘i he kamata‘angá pea ‘e to e a‘u ki he ngata‘angá, ko e ‘Otuá pe. Pea ta ko  e Potó, ko e ‘Otuá ia. Pea ko e fakakoloa ia ‘a e folofola ni, “tau tali ‘a e akonaki ‘a e ‘Otuá ka tau ‘inasi ‘i he potó.” Pea ko e taimi ‘oku tau tali ai ‘a e Potó, ko e faka‘amú ke ‘oua ‘e to e hiki mei ai.

‘Oku tokolahi ‘a e kakai ‘oku nau fakakaukau, ko e potó ko e ola ia ‘enau feinga ako ‘oku faí. Pea ko kinautolu ‘oku ‘ikai ma‘u ha faka‘ilonga ako, ‘oku ‘ikai ke poto ia. Ka ‘oku fakaongo mai ‘e he folofola ni, ko  e potó ‘a e tokotaha ‘oku fanongo ki he le‘o ‘o e ‘Otuá pea tauhi  hono ‘alungá.  

‘Oku maumau taimi ‘ete ako lelei kae ‘ikai ‘apasia mo talangofua ki he fekau ‘a e ‘Otuá. Ka ‘oku lau ko e potó ‘a e tokotaha ‘oku ‘ikai ako lelei ka ‘oku fakaongo ki he le‘o ‘o e ‘Otuá. ‘Io ‘a e tokotaha ‘oku ne ‘ilo‘i ‘a e ‘alunga ‘o e kau faikoví pea afe mei ai. Mo‘oni ‘a e punake, “Sīsū ko Koe pe ko e maama mo‘onia, fa‘ahinga poto kehekehe ko ho huelo ia.”

Fifili:  ‘Oku ou fou nai ‘i he ‘alunga ‘o e potó pe ‘ikai?

Lotu:  ‘Eiki Lelei, ‘oku ou fakafeta‘i atu ‘i Ho‘o hoko mai ko e fakahinohino ke u ‘ilo ‘a e poto mo‘oniá. ‘Emeni.